THE ANNIE ROSE SCANDAL

[kampanaryo_spy]

(By special request, we are reprinting this Gitik-gitik from the previous incarnation of tagosds.org, the "Kahungan-hunganan nan Tago" blogspot)

Araw nan Tago 1998. Gapasiugda nan indigay nan yagkadaiya na sayaw an munisipyo. Mga purok astan mga barangay an mga entrante.

Iban kami nan mga barkada. Como managlain kami na purok, insig-insigan. Ka bando kami ni Nonon Villamor sa Purok Tambis kay yadto na panahon vice mayor pa siya.

Otcho ka sayaw an contest. An iban na purok ug barangay, lain-lain an contestants kada kategorya. Inday uno taraw na gapa-usar san Purok Tambis nan isa da ka paris na contestant sa tanan otcho ka sayaw. Abay na kami pabati-bation daan nan barkada na: uno taraw yaon Purok Tambis, wara nay gayud lain na permi dakan sa amo an manayaway?

Ga puyo kami ni Nonon kay tinu-od sa agaw: unoy pag akon-akon na ka arang na lihiro mo mudansa; kibali lugar in nihitan na gayud? An contestant nan Purok Tambis na babaye edadan na, lagpas 50 na siguro. An ila bay yaon gayud sa sentro nan Tago, sa isa na mga eskina na gatabas nan Provincial Road.

An gym huoti kay gawas na dili masih-sih an tao, punoi isab nan mga lamisa na gabaguod nan makuyam-kuyam. Curacha an primero na contest. Ini na sayaw kinahanglan maglinaap-laap an manayaway kay courtship dance sa. Paga tagna na daan nan mga tao na Gamut an mudaug kay pwersada sa gayud musakiki si Trifon Azarcon sa iya paris, singkitar higut na paga takigan.

Kumustaha bulaw kay nan tanto kumpas ni Trifon yaligad sa siya? di minsibaw an iya babaungan sa eskina nan lamisa, ug yapawong an iya panan-aw. Yagkaguliyang an mga tao, may yangatawa. Ambaya panadlihan na yadto nan umaabot na hitabo sa mananayaw nan Purok Tambis.

Ika upat pa na contest, maluya nan mga lukunan nan paris nan Purok Tambis. Sinoy di luyahon na hurot sa gayud matuyok an mga sayaw: rhumba, boogie, chacha, ug uban pa. Basta kay sa cha-cha pa lamang, singkitar na kaniya kuding na gahinok.

Ug ini na. Ika unom na contest: Swing. Yatinga kami ni Nonon na min-aligmaat sa an babaye na dancer nan Purok Tambis ka abtik, singkitar palaka na inka tubigan. Ambaya amoy gayud taraw yadto iya kina-ima, kinakusgan lugar niya, demodo mamah-mamah na niya an steps. In fairness, lamii-hay gayud taraw adton iya salida sa sugod. Kuman ini kay may portion sa taraw na mag binirahay sila nan iya paris haw aligmaat siya sikyahon nan laki haw itambibis nan gakatuyok. Pagtuyok gayud ini kuman, minkalit sa pagkisi-kisi an babaye kay bagan may gusto kawhaton sa iya bakagwang. An laki pugong isab, kay kon aya agaw mahiwirik an babaye dihaw kasawaingi, gawas pa na kahapdusi magbangon astan kasawaing mag bow nan may butoy sa tuktok.

Tuyok-tuyok taraw sila amodan mga turumpo. Taud-taud gayud, amo dakay amo inkit-an ni Nonon na yahakad na sa bilahan nan babaye an iya panty, adesir mahug na unsay hula hoop sa bantaw nan gym.

Hesusmariahusep! An sigbinan, kadayaw gat-an nan lanud!

Minpiyong ako. An mga tao unsay mga sinantima-an, wara managpakatingug na kibali intanungan.

Padayon pag sayaw an iban na contestants nan lain na mga purok. Ug sa way sabernada, sali punita nan mananayaw nan Tambis an iya dugmon, haw dagan ngadto sa likod nan stage, haw balik da isab sa tunga nan court, biraha an iya partner haw padayon pag sayaw nan "Rock-baby-rock! Rock-into-my-life."

Makabubungog na palakpakan!

Kami ngadi sa kilid luha-luha na nan kinatawahay bisan patay na kami nan kantyaw nan barkada. Laong nila: sosyali gayud an taga Purok Tambis kay bisan wara nay panty minsayaw sa gayud gihapon!

Kulbai kami ni Nonon kay kon haw aya na isab itukay nan laki an babayi haw mukayab an iya bado kay dihaw di manghalin-halin an kanan babaye "alkansiya?"

Pero bisan taraw yangatawa kami ni Nonon, pareho kami langut na gahu-huna: an bigtuyon wa sa da-an maniguro pag palit nan bag-o na panty sa Bol-anon; obin, awat sa maluya na aton garter nan iya diaper, wara lugar daan ganguti nan upat ka dosena nan di na manulig na arpiler.

Basta pag uli namo, makigkamatay na si Nonon kay pagapabati-bati sa kamin mga tao na: bahala pildi basta wa ka-halhali nan panty!

"Rock-baby-Rock, Rock-into-my-life!"

[badung]

Thank you, K_spy, for posting this. Arang ko gayud na katawa, basta kay dayawi an ako feeling kuman pagkatapos na yahikatawa gayud ako nan sakto. Inkabasahan ko na ini sa una, but just the same, yahikatawahi gayud gihapon ako, as if, amo pa nako inkabasahi.

Gasugod ako mahikatawa nan yaluya nan mga lukunan nan taga tambis, amo da nan kuding na gahinok....

(uno sa isab adton babaye, wara sa magpalit nan pantyhose?)

[kiboglets]

kspy,

salamaterz gayud! kapoyi pa ako gikan sa amo seminar pero basa gayud dayon ako nan imo bag-o na inpost nganhi.
Inkatingad-an na isab ako nan ako mga kids kay pur-ak na isab ako nan katawa bisan ako da isa. ay2 lamang tinoodi sa gayud an "LAUGHTER IS THE BEST MEDICINE".

[ramojs93]

Kspy,
Salamat, basta kay gabasa ako dungan an ubo ug katawa, yatinga lang an bana ko abi niya i am going crazy kono.. That is true Poruk Tambis is the best....

[toyang]

K-spy,

Ay! ay! kamps, gutasan sa isab kita nan abay kumatawa nan ini!
ha ha ha ha ha ha ha ha! busogi ako nan hangin abay nganga ngadi. Diin ini naadi na wa ko sa kabatoki pagbasa?

[toyang]

K-spy,

Naay pa, na uno ya champion gayud yadto na contestant kay grabe sa gayud niya na pag pidi pidi nan sinayaway
hangtud na inkahalhalan na siya nan panty?

[kampanaryo_spy]

K-spy,

Naay pa, na uno ya champion gayud yadto na contestant ?

labaw pa! hala tukda unoy premyo?

[pato]

laong pa ni te cordaps; you are one of a kind....

[gingot]

K-spy,

Naay pa, na uno ya champion gayud yadto na contestant ?

labaw pa! hala tukda unoy premyo?

k_spy,

thanks for d hearty laugh!!! on a lazy sunday morning...
Annie Rose is synonymous with SOEN, d ba? Boxful of them an premyo nan dancer??? how about sa iya partner... uno kaha???

[toyang]

]K-spy,

Aduy inday isa ka box na arpiler obin garter.

[nelo]

ba sab basin patay sindi an suga""".... kanaman yakalaong cya na yaon cya sa kabaret na pedi mag hubo-hubo